情陷夜中環： 100個未接來電

有關分手的比喻，最貼切還是這個：分手有如在馬路上cut線，你總不可以話cut就cut，這是沒品的司機才會做的行為。如果你是有經驗的司機，你會知道 失驚無神將軚盤扭向一方，其他的車輛有機會閃避不及，最後可能釀成嚴重後果。有品的司機，決定cut線之前會打燈，目的就是要給對方一個signal。 Yes，signal好緊要，預先畀個心理準備人哋，然後才慢慢地、自然地cut過去。那當然，分手就是分手，冇人話畀咗signal之後就可以分手分得 皆大歡喜，就正如被人cut線的司機，都唔會話因為你畀咗個signal佢，而佢就會話「你cut我線我真係好開心呀」。既然佢係唔係都會唔開心，咁點解 仲要畀signal咁麻煩？Well，世事豈能盡如人意，但求無愧於心，打燈就是這個道理。

上星期一的IFC，出現咗一個奇景。我話奇景，的確有 少少誇張，但真的，在這個地方剛好工作十年，也從沒見過這等事情發生。那一晚，留在公司工作到很晚，差不多九時才離開。還未吃晚飯，所以打算求其吃幾件壽 司醫肚。就正當我從公司的升降機大堂走入商場的時候，我看見一個女人在哭。年約三十歲，長頭髮，稍嫌老土的黑白OL裝束，即係白恤衫黑色裙加件黑色 cardigan。個樣靚唔靚？Honestly，唔知，因為佢喊得好犀利，唔係眼角流兩滴眼淚咁簡單，係喊到「扯晒蝦」嗰種。佢喊到面容嚴重扭曲，所以 我睇唔到佢本身個樣靚唔靚。係，有啲女仔喊起上嚟好靚，但佢絕對唔係呢種。

你大概應該估到，老土OL唔係一個人企喺度喊。鬼上身咩，一個人好哋哋點會無端端喊到豬頭咁？冇錯，企喺佢面前，係一個男仔。我一見到男仔個樣，好奇心立 刻急速膨脹，因為我識呢個男仔，佢同我同一間公司但係唔同department，係邊個department就唔好講啦。男仔一身運動裝，滿頭大汗，根據 我作為一個private banker的專業分析和觀察，我大概work out到之前嗰幾分鐘發生過乜嘢事。男孩子正在做gym，做得如火如荼之際，就收到老土OL的奪命追魂call。佢應該打咗好多次畀個男仔，如果唔係，男 仔唔會衫都唔換而且滿頭大汗就走落嚟。

IFC鬧分手不尋常

以上所述場面，就是我所說的奇景。中環人注重class，所以中環人不會做沒有class的事。或者應該說，中環人也會做沒有class的事，但他們不會 選擇在大庭廣眾做出來。情侶當街當巷吵大鑊，唔係乜嘢出奇事，但呢件事竟然發生喺IFC，證明咗個女仔真係好desperate，又或者佢好唔甘心，如果 唔係，佢唔會喺一個咁嘅地方喊到咁樣。個男仔又真係鐵石心腸到不得了，佢企喺個女仔面前，只係用一個極不耐煩嘅表情望住個女仔。

填飽肚子後，想起 要回公司拿點東西，於是又往寫字樓的方向走。就在這時候，我跟那個那位同事的眼神碰過正着，女士竟然還在糾纏。男人望着我聳聳肩，表情一臉無奈。我用兩隻 手指向他比了一個「走路」的手勢，即是叫他快啲閃。當男人正想向我「回覆」之際，他的女友突然抬起頭。那個懷着破碎小心靈的她，向男生走前一步，而那個男 人竟然惶恐的往後一退。約兩秒鐘後，女的離去，男同事慢慢地走過來。

點呀？ok嗎？「你話呢。」他苦笑說。隔一陣冇事㗎啦，我說，心裏肯定唔會咁 快冇事。「I hope so，咁夜都未走？」走啦，陣間仲約咗人飲嘢。「嘩，Monday night都飲？」我個朋友聽日返去Chicago嗰邊，所以catch up吓囉，你join唔join？大佬，我擺明隨口問吓，然後expect佢話「thank you不過下次先啦」。點知，佢竟然話yes。佢冇真係話yes，但係佢就問：「唔會唔方便咩？」我諗，佢今晚真係需要有個人同佢傾吓偈。

因為我的朋友是北京人，所以我們全程都是普通話夾雜少少英文。起初以為男同事的普通話不太靈光，所以沒有說太多，怎料他一開口就聽得出他的普通話實在不 錯。我們談起iPhone6，然後還在用5S的男同事就問：「你們知道5S最多可以顯示多少個未接來電嗎？」我和北京朋友都被他這個問題考起，原來未接來 電的數目有上限嗎？「我女朋友，應該是以前女朋友，過去三天，每兩分鐘給我打一個電話，但去到100個未接來電的時候，電話顯示的數字就停留在100，沒 有繼續加上去，雖然她仍然是每兩分鐘一個電話。」我們知道這個iPhone的秘密後，不禁大笑起來。

之後的話題，很自然就扯到他們的故事去。男同 事憶起他們一年半前剛開始的時候，女生說的一句對白：「先別太認真，好嗎？也不需要有任何承諾，順其自然就好，最重要是空間，我怕有壓力。」有些男人不能 接受這種愛情觀，有些男人發夢也想找個能有這種「胸襟」的女人，我認，我屬於後者。可惜，女人的瀟灑，多數是扮出來的。有一天，男同事去Prada專門 店，選購波鞋。女人全程沉默，沒有意見。買完戰利品後，女人好半天沒有說話，男人終於問她有甚麼事。

太早談將來冇好結果

「你那對Nike不是好好的嗎？」女人問。Nike是做運動的，Prada是平時穿的。「Nike不可以用來平時穿嗎？」男人無言，想起以前女友說的那句 「最重要是空間」，原來一切都是「夢囈與謊言」。「你其實有沒有為我們的將來籌劃一下？」女人再問。有些男人很怕女人，但其實你們要知道，「怕」，並不是 真正的愛。怕女人的男人，好易管，只要妳惡，佢就會驚，只要佢驚，佢就會乖。對於那些不怕女人的男人，妳要控制的，不是他們的腦，而是他們那個心。

由 那對Prada波鞋開始，女人漸漸露出原形，以前的可愛、隨意、調皮，剎那間消失。男同事眼中，女人一下子老了十年，因為她正自把自為地把他們的人生16 倍fast forward。男同事不想就此跟女人快速老死，所以他選擇及早跳離沉船。所以話，當一個女人跟男人太早談及將來的時候，就是她正式斷送自己將來的時候。